Софискиот окружен суд им одреди притвор на четворица од петте лица приведени за вандализмот пред зградата на Претставништвото на Европската комисија и Европскиот парламент во Софија во саботата.

Малолетникот меѓу нив е пуштен на слобода и ќе го надгледува детската педагошка служба. Претходно обвинителството од судот побара постојан притвор за петмината првично приведени за инцидентот во саботата.

Мотивите на судот за преземање на најстрога мерка кон останатите е опасноста да извршат друго слично кривично дело.

Мерките се разгледувале зад затворени врати поради тоа што еден од обвинетите имал 17 години.

Одлуката на судот не е конечна и може да се обжали на 4 март.

„Овој дел од пресудата што се однесува на четворицата обвинети ќе ја обжалиме во вторник во софискиот суд. Причините во барањето за превентивна мерка од страна на судот во Софија, дека на 26-ти ќе има нов протест, па можеле да направат друго кривично дело, е апсолутно исмевање на човековото право на луѓето да протестираат. Јас самиот сум заменик претседател на партијата „Преродба“ и јас не знам дали ќе има протест на 26-ти. Но обвинителството ете го знае тоа“, рече Петар Петров, пратеник од „Преродба“ и адвокат на обвинетите.

Петров го коментираше и барањето на главниот јавниот обвинител Борислав Сарафов во врска со можни докази за кривично дело извршено од лица со имунитет при вандализмот врз зградата на Европската комисија и Европскиот парламент.

Откако прифативме укинување на постапката за негов избор за јавен обвинител, сосема е нормално криминалната репресија да ја насочи кон „Преродба“, посочи Петар Петров.

„Преродба“ во саботата организираше протест за зачувување на бугарскиот лев пред Бугарската народна банка. Подоцна, сепак, тензиите ескалираа пред зградата на претставништвото на Европската комисија во Софија, откако демонстрантите против еврото фрлаа црвена боја и петарди врз неа. Гореше и вратата од зградата. Татнежот на бомбите продолжи неколку минути, а полицијата ги турна демонстрантите подалеку од зградата.

На местото на настанот пристигнаа пожарникари и претставници на жандармеријата. Министерот за внатрешни работи Даниел Митов нареди итни мерки и дејствија на полицијата низ државата за откривање и приведување на сите одговорни за вандалскиот напад врз зградата на Европската комисија и Европскиот парламент во Софија, информира МВР.