Еден навидум обичен историски документ, познат како „писмо од Бордо“, ги фасцинира филателистите ширум светот повеќе од 100 години. Содржината не е особено значајна, а вредноста лежи во нешто сосема друго – комбинација од исклучително ретки поштенски марки што се користеле за испраќање.

Денес, писмото е во сопственост на анонимен колекционер од Сингапур, а експертите го сметаат за „најскапото писмо во светот“, пишува „Одити централ“.

Приказната започнува на 4 октомври 1847 година, кога Едвард Франсис, трговец со вино од Порт Луис, главниот град на тогашната британска колонија Маврициус, испратил известување до своите деловни партнери во Бордо.

Во писмото, тој навел дека примил 48 буриња вино што му биле испратени и дека веќе продал речиси една третина од пратката.

За да го испрати писмото, купил две поштенски марки, кои во тоа време вределе само неколку пени. Денес, речиси два века подоцна, нивната вредност се мери во милиони.

Писмото содржи две исклучително ретки марки – Маврициус сина и „сестринската“ верзија Маврициус розова.

Првата се смета за една од најпознатите и најскапите поштенски марки во светот, значително повредна од розовата варијанта. Она што го прави „писмото Бордо“ уникатно е фактот што содржи оригинални копии од двете марки.

Познатите марки на Маврициус се создадени по грешка во 1847 година. Наместо натписот „Post Paid“, авторот погрешно вметнал „Post Office“ на марките, веднаш до профилот на кралицата Викторија.

Околу 500 примероци биле испечатени и пуштени во оптек пред да се исправи грешката.

Денес е познато дека има само 27 примероци – 12 сини и 15 розови – кои се сметаат за речиси „митски“ во светот на филателијата.

Зачуваните и неискористени примероци од марката Мавризиус сино, според процените, вредат помеѓу 10 и 15 милиони евра, но ретко се појавуваат на пазарот бидејќи колекционерите речиси никогаш не ги продаваат.

„Писмото од Бордо“ последен пат беше продадено во 1993 година за приближно четири милиони долари, а оттогаш е во сопственост на мистериозен колекционер од Сингапур.