Кошаркарската ѕвезда на Лос Анџелес Лејкерс, Лука Дончиќ, сподели ретка фотографија со своите две ќерки, откривајќи дел од приватниот живот по бурниот период што го одбележа неговото раскинување со поранешната свршеница Анамарија Голтес.

На фотографијата, која ја објави на Инстаграм, 27-годишниот словенечки кошаркар седи на кауч, прегрнувајќи ги своите ќерки во емотивен семеен момент.

Објавата доаѓа неколку месеци по разделбата на Дончиќ и Голтес, со која има две ќерки. Нивната прва ќерка, Габриела, се роди во ноември 2023 година, кога Дончиќ беше член на „Далас маверикс“, додека втората, Оливија, се роди во декември 2025 година во Словенија.

Само неколку месеци по раѓањето на Оливија, Дончиќ потврди дека ја прекинал свршувачката со Голтес.

„Ги сакам моите ќерки повеќе од сè и тие секогаш ќе ми бидат на прво место во животот“, изјави тогаш кошаркарот.

Во меѓувреме, поранешната двојка води судска постапка. Според повеќе медиуми, Голтес поднела барање во Калифорнија за детска издршка и покривање на судските трошоци, додека правниот тим на Дончиќ побарал барањето да биде отфрлено. Следното рочиште е закажано за 14 август.

Дончиќ претходно истакна дека се залага за заедничко старателство и сака да поминува што повеќе време со своите ќерки во Соединетите Американски Држави.

Токму семејството беше причината поради која во мај соопшти дека ова лето нема да настапува за словенечката репрезентација, туку ќе се посвети на закрепнувањето и времето со своите деца.

Во меѓувреме, го очекува и ново поглавје во НБА. По заминувањето на Леброн Џејмс, Дончиќ ќе биде главната ѕвезда на Лос Анџелес Лејкерс, кои веќе го засилија составот со неколку нови играчи.

Минатата сезона словенечкиот кошаркар шести пат беше избран во идеалната петорка на НБА, заврши на четвртото место во изборот за најкорисен играч (МВП) и беше најдобар стрелец во лигата со просек од 33,5 поени по натпревар. Сепак, повредата на задната ложа го спречи да настапи во плејофот.

Судејќи според неговата последна објава, Дончиќ во моментов е најмногу посветен на улогата што самиот ја смета за најважна – да биде татко на своите две ќерки.

ВИДЕО | Дончиќ убеди соиграч од Лејкерс да игра за Словенија