Панатинаикос создава тим со највисоки амбиции, а контроверзниот сопственик на клубот Димитрис Јанакопулос повторно ја подигна прашината со своите изјави. По серијата големи засилувања, тој ги израдува навивачите, но и дополнително ја разгоре фантазијата со споменување на најголемата кошаркарска ѕвезда од Европа – Никола Јокиќ.

„Зелените“ летово направија сериозен ремонт на составот и му обезбедија на ново-стариот тренер Жељко Обрадовиќ квалитетен тим со кој ќе атакува на европскиот врв. Покрај носителите од минатата сезона, како Најџел Хејс-Дејвис, Кендрик Нан, Матијас Лесор и Џеди Осман, во Атина пристигнаа и Бранко Бадио, Исак Бонга, Гершон Јабуселе и Мустафа Фал.

Јанакопулос, познат по своите смели потези и изјави, по официјализирањето на новите трансфери се огласи на социјалните мрежи и испрати порака која привлече огромно внимание.

„Верувам дека изградивме нешто многу силно. Но,  не знам како Јокиќ ќе се вклопи следната година“, напиша тој.

Иако шансите Никола Јокиќ наскоро да се пресели во Европа се речиси невозможни, Јанакопулос во повеќе наврати истакнуваше дека би сакал српскиот ас еден ден да ја заврши кариерата во дресот на Панатинаикос.

Засега, тоа останува само желба, но амбициите на грчкиот гигант се јасни – враќање на европскиот трон и создавање тим кој ќе се бори за најголемите трофеи.

ВИДЕО | Се скандираше и се пееше — навивачите на Панатинаикос спектакуларно го пречекаа Обрадовиќ