Вимблдон денес добива тениски спектакл. На централниот терен во Лондон ќе се сретнат двајца од најдобрите играчи на денешницата – Новак Ѓоковиќ и Јаник Синер, во полуфинале кое со нетрпение го очекуваат љубителите на белиот спорт ширум светот.

Иако нивното ривалство нема долгогодишна историја како легендарните дуели меѓу Ѓоковиќ, Роџер Федерер и Рафаел Надал, пресметките меѓу српскиот ас и италијанскиот тенисер веќе се гаранција за врвен тенис, неизвесност и спектакл.

Ова ќе биде нивна 12. меѓусебна пресметка, а Синер има минимална предност во победите со 6-5. Дуелот носи и голем влог – Ѓоковиќ се бори за ново финале и можност да стигне до 25. Гренд слем трофеј, додека Синер сака да покаже дека и понатаму е лидер на новата генерација.

„Јаник е број еден во светот, актуелен шампион на Вимблдон и игра неверојатен тенис. Нијансите ќе одлучат, особено на трева. Се борам за историја, но сè уште имам огромна страст за натпреварувањето“, изјави Ѓоковиќ.

https://www.slobodenpecat.mk/gjokovikj-go-pobedi-safiulin-i-urna-rekord-na-vimbldon/

Од другата страна, Синер има огромна почит кон својот противник, но најавува борба до последниот поен.

„Ако сакам да имам шанса против Новак, морам да го подигнам нивото. Тој и понатаму игра на неверојатно ниво. Мора да бидете храбри против него, бидејќи ако му дозволите да го контролира ритамот, многу е тешко да го победите“, порача Италијанецот.

Ѓоковиќ на Вимблдон има седум титули, додека Синер е актуелен шампион откако минатото лето токму во полуфиналето го елиминираше српскиот тенисер. Ѓоковиќ возврати оваа година на Австралија опен, каде што славеше во пет сета.

Денеска во Лондон следува нова голема тениска пресметка – дуел меѓу искуството и историјата на Ѓоковиќ, против младоста и амбицијата на Синер.

Неверојатна традиција: Кога има Мундијал, Ѓоковиќ го освојува Вимблдон