Норвешката фудбалска репрезентација ги наруши подготовките за четвртфиналниот дуел против Англија на Светското првенство, откако по само една ноќ го напушти хотелот во кој беше сместена.

Според норвешките медиуми, Ерлинг Халанд и неговите соиграчи биле незадоволни од условите во хотелот во Форт Лодердејл. Главните забелешки се однесувале на бучавата од блиското градилиште, недостатокот на простор за тимски состаноци, слабата хигиена и прометната околина, што, според нив, негативно влијаело на подготовките.

Селекторот Стејл Солбакен потврди дека репрезентацијата побарала промена на сместувањето, а ФИФА веднаш реагирала и помогнала во преселбата во друг хотел.

„Имаше неколку работи што не беа во ред. Сакавме подобри услови за тимот да биде заедно и максимално фокусиран пред важниот натпревар“, изјави Солбакен.

Капитенот Мартин Едегор истакна дека целта била да се создадат најдобри можни услови за подготовка пред дуелот со Англија.

Дополнителен проблем за Норвежаните претставуваат и долгите патувања низ САД, кои, според медиумите, оставиле трага врз тимот. Неколку фудбалери се пожалиле на вирусни симптоми, што дополнително ја комплицира ситуацијата во пресрет на еден од најважните натпревари во нивната понова историја.

Конфликт стар повеќе од 40 години може да го одреди судијата за финалето на Мундијалот