Турскиот претседател Реџеп Таип Ердоган им приредил необичен дипломатски подарок на лидерите кои присуствувале на Самитот на НАТО во Анкара – гравиран револвер со име и кутија со боева муниција, пренесе ТукијеТудеј.

Подарокот го открил британскиот премиер Кир Стармер пред новинарите, при враќањето од Анкара. Но, тој не можел да го внесе револверот во Велика Британија, бидејќи таквиот потег би бил спротивен на британските закони за огнено оружје.

На истиот Самит присуствуваше и македонската претседателка Гордана Сиљановска-Давкова, но засега од нејзиниот претседателски Кабинет немаат информација дали и таа добила ваков подарок. Оттаму ни ветија дека наскоро ќе ни одговорат на прашањето.

Револверот на Стармер, според написот, ќе остане во Анкара и ќе биде деактивиран, иако Ердоган приложил и лична белешка со која ги укинува турските извозни ограничувања за оружјето. Таа белешка, сепак, не можела да ги надмине британските правила.

Засега не е познато дали и други лидери на НАТО се соочиле со сличен проблем, односно дали можеле да ги однесат подароците во своите земји.

Подароците биле доделени на маргините на 36. Самит на НАТО, кој се одржа на 7 и 8 јули во претседателскиот комплекс во Анкара. Тоа беше прв Самит на НАТО организиран од Турција по Самитот во Истанбул во 2004 година.

На Самитот доминираа теми поврзани со одбранбените трошоци, поддршката за Украина и можноста за обновување на американската продажба на оружје за Анкара, меѓу кои и евентуалното укинување на долгогодишната забрана за продажба на борбените авиони Ф-35 на Турција.

Ердоган им подари гравирани пиштоли на лидерите на НАТО

„Знаете ли кој носи очила за сонце во затворено?“ – Макрон предизвика шеговити коментари