Додека некогаш посетата на музеи, плоштади и познати знаменитости беше неизбежен дел од секое патување, сè повеќе туристи денес на својата листа задолжителни места додаваат уште една необична дестинација – локалниот супермаркет. Новиот тренд, познат како „Супермаркет сафари“, ја претвора обичната набавка во вистинско културно доживување, а полиците со производи стануваат начин подобро да се запознае секојдневниот живот во земјата што ја посетуваат, пишува „Бизлајф“.

Ако летово забележите туристи како со голем ентузијазам фотографираат чипсови, сирења, јогурти или други прехранбени производи, најверојатно не се изгубиле. Тие го следат еден од најнеобичните туристички трендови на оваа година – „Супермаркет сафари“.

Наместо да чекаат долги редици пред најпосетуваните атракции или да плаќаат сè поскапи билети за музеи, многу патници избираат да ги истражуваат локалните продавници. Причината не е само заштедата, туку и желбата подобро да ја запознаат земјата преку производите што нејзините жители ги купуваат и ги консумираат секој ден.

Култура меѓу полиците

Денес супермаркетот не е само место за купување, туку и своевиден водич низ локалната култура. На неговите полици можат да се најдат автентични производи, регионални специјалитети и домашни брендови кои не се достапни во други земји, нудејќи многу пореална слика за секојдневниот живот отколку продавниците за сувенири.

Во Франција туристите бараат сирења што никогаш не ги виделе надвор од земјата. Во Шпанија корпите ги полнат со необични грицки и конзервирани морски плодови, додека во Италија истражуваат десетици видови тестенини, маслиново масло и готови сосови што локалното население редовно ги користи.

За многумина, посетата на супермаркет веќе е подеднакво интересна како разгледувањето на локалните пазари или рестораните.

Патување со помалку трошоци

Популарноста на овој тренд дополнително ја поттикна и поскапувањето на патувањата. Сè повеќе туристи престојуваат во апартмани наместо во хотели и сами си подготвуваат храна. Тоа природно ги носи во локалните продавници, каде што не само што трошат помалку, туку и одблиску ги запознаваат навиките во исхраната на земјата во која престојуваат.

За разлика од рестораните во туристичките центри, супермаркетите нудат многу поверна слика за секојдневието – од производите што се на попуст до омилените слатки, пијалаци и готови јадења што локалните жители ги купуваат секој ден.

Нов хит на социјалните мрежи

Социјалните мрежи дополнително придонесоа за ширење на овој тренд. Видеа во кои креаторите на содржини покажуваат што купиле во супермаркети во Јапонија, Италија, Грција или Португалија редовно достигнуваат милионски прегледи.

Наместо класични фотографии од туристички знаменитости, сè почести се снимките на кои се дегустираат локални чоколади, се споредуваат вкусови на газирани пијалаци или се испробуваат производи што можат да се купат само на едно место.

Таквите објави инспирираат и други патници да организираат свое „супермаркет сафари“.

Повеќе од обично пазарување

Иако на прв поглед звучи необично, посетата на локален супермаркет се покажува како еден од најлесните начини да се почувствува духот на една земја. Преку производите што луѓето ги ставаат во своите кошнички може да се откријат гастрономските навики, локалните вкусови, па дури и разликите во начинот на живот.

ВИДЕО: Италијанец прошета во македонски маркет, некои работи му беа чудни