Претставниците на германската економија изразија загриженост поради порастот на популарноста на радикалната десничарска Алтернатива за Германија (AФД), плашејќи се за меѓународната конкурентност на Германија поради зголемената ксенофобија.

„Порастот на популарноста на AФД ме загрижува, и лично и како претприемач“, изјави за агенцијата ДПА претседателот на Здружението на германски работодавачи Рајнер Дулгер, пренесува Хина.„АФД негира дека климатските промени се предизвикани од човечка активност. АФД е непријателски настроена кон Европа. Ова всушност треба да ги исплаши граѓаните, а не да ги привлекува“, рече Дулгер.

Тој порача дека на граѓаните треба уште еднаш да им се даде можност да се вратат во демократските партии и ја повика социјалдемократско-зелено-либералната влада да го прекине трендот на постојани препукувања во коалицијата. И Јоерг Дитрих, претседателот на Централното здружение на германски занаетчии, апелираше до владата да иницира процеси што ќе доведат до тоа граѓаните повторно да се движат кон центарот на политичкиот спектар.

Претставниците на економијата и водечките економисти веќе долго време предупредуваат за последиците од зголемената популарност на АФД, која се етаблира на повеќе од 20 отсто во анкетите на јавното мислење, а во некои делови на источна Германија, со повеќе од 30 проценти од поддршката, таа е веројатно најсилната политичка партија.

Ова е особено поврзано со фактот дека Германија хронично нема квалификувана работна сила, која, според плановите на сојузната влада, треба да се ублажи со дополнителна имиграција.

„Привлекувањето странска работна сила нема да успее во посакуваниот размер доколку партиите кои се залагаат за изолација, како што е АФД, продолжат да растат во популарноста“, рече економистката Улрике Малмендиер, членка на т.н. Економски мудреци кои ја советуваат федералната влада за економски прашања.