Машката младинска кошаркарска репрезентација на Македонија со победа го отвори настапот на Европското првенство од Дивизијата „Б“ во Братислава.

Избраниците на селекторот Никола Велев го совладаа домаќинот Словачка со 71:63, обезбедувајќи одличен почеток и дополнителна самодоверба пред натпреварите кои следуваат во групата „А“.

По изедначениот почеток, во кој Словаците имаа минимална предност по првата четвртина (17:15), македонските кошаркари одиграа извонредни десет минути во вториот период. Со цврста одбрана, агресивен пристап и разновидна игра во нападот, нашата репрезентација целосно го презеде контролата врз натпреварот.

Предводник во тие моменти беше Коста Ќириловски, кој сите свои 15 поени ги постигна во првото полувреме и беше најзаслужен Македонија на големиот одмор да замине со убедлива предност од 41:28.

Македонија уште посилно го отвори второто полувреме. Со серија од 10:0 ја зголеми разликата на највисоки 51:28, изгледаше дека победникот е решен уште во третата четвртина.

Сепак, домаќинот не се предаде. Словачка возврати со серија од седум неодговорени поени, а до крајот на третата четвртина ја намали негативата на 54:46. На почетокот на последниот период противникот се доближи и на само пет поени (57:52), заканувајќи се дека може целосно да се врати во натпреварот.

Во клучните моменти Македонија повторно реагираше одлично. Амар Грбовиќ, Сергеј Младеновски и Атанасиј Трајанов реализираа важни поени за враќање на двоцифрената предност (64:52), а потоа Марко Луканоски со кош на помалку од три минути до крајот ги постави работите на свое место (66:52). До последниот звук на сирената македонските кошаркари сигурно ја зачуваа стекнатата предност и заслужено стигнаа до првиот триумф на шампионатот.

Најефикасен во македонскиот состав беше Коста Ќириловски со 15 поени, сите постигнати во првото полувреме. Марко Луканоски беше на чекор до „дабл-дабл“ учинок со 11 поени и девет скока, додека Давид Петрушевски натпреварот го заврши со 10 поени и пет скока.

Во натпреварот од првото коло во групата „А“, Шведска убедливо го совлада Азербејџан со 85:58, додека репрезентацијата на Ирска беше слободна. Македонија веќе в сабота ја очекува натпреварот од второто коло, во кој од 13.30 часот ќе се сретне токму со селекцијата на Ирска.