Годината што изминува за пејачкатаВо 2025 година сакам да ги оставам зад себе сите солзи што ги исплакав беше година исполнета со промени, лични лекции, нови предизвици и моменти што ја обликувале повеќе отколку што можела да очекува. Во периодот кога празничната магија веќе влегува во домовите и кај луѓето, разговаравме со Ноне за „Слободен печат“. Таа ни откри дел од своите најдраги спомени, најважните лекции и солзите што сака да ги остави зад себе, но и надежите што ги носи во 2026 година.

Во продолжение следува топол и искрен новогодишен разговор за детските традиции, големите пресврти, малите добрини и желбите за следната година што веќе ги „спакувала“ под елката.

l На која новогодишна традиција од детството секогаш се сеќаваш кога ќе почне празничната магија?

– Најмногу и најубави спомени имам од училиште – сите заедно ја украсувавме училницата, вежбавме за приредби, рецитиравме песни и со радост го чекавме Дедо Мраз да ни подели новогодишно пакетче. Дома никогаш нема да го заборавам китењето на елката со мајка ми, со стаклени лампиони и многу шарени трепкачи што ја правеа собата волшебна. И секако, пишувањето новогодишни честитки – нешто што секогаш ми носеше посебна радост.

l Која е најважната лекција што ја научи во 2025?

– Сон, тело, ум и срце – моите темели што ме држат кога сè околу мене се менува.

l Кој момент од годината би го издвоила како најголем успех или пресвртница и зошто?

– Најголемата пресвртница во мојот живот беше кога заминав да работам на брод. Тоа искуство ме промени на начин што малку нешта можат – ме научи да гледам на светот и на луѓето без предрасуди, ме направи поотворена и посилна личност и ми покажа дека сум способна да се приспособам и да растам на начини што претходно не можев ниту да замислам. А што се однесува до најголемиот успех, иако имав неочекуван успех со музиката, чувствувам дека најголемиот успех допрва треба да го доживеам. Но, можеби сум многу блиску до него.

l Што би оставила зад себе во 2025, а што носиш со себе во 2026 година?

– Во 2025 година сакам да ги оставам зад себе сета болка, тагата и сите солзи што ги исплакав. Во 2026-та сакам да ја понесам со мене емпатијата – мојата сила да разбирам, да чувствувам и да бидам човек, без оглед на сè.

l Што те инспирираше најмногу оваа година?

– Нечии мали добрини ме потсетија дека во светот има многу повеќе убавина отколку што мислиме. Тие мали гестови го прават секојдневието посветло и ме учат да ги забележувам убавите моменти што се кријат во најобичните денови. Понекогаш доволно е само едно мало внимание за да те потсети колку е убаво да се биде човек меѓу луѓе.

l Која желба за 2026 би ја „спакувала“ под елката?

– Повеќе насмевки без причина – она слатко чувство кога сфаќаш дека ти е добро без ништо „големо“, без спектакли, без совршени моменти. Само ти, мирот во тебе и некоја мала искра што те потсетува дека е убаво да се живее. Сакам повеќе такви денови во 2026 година, природни, лесни и искрени.

l И за крај, дали накити дома? Како и со кого ќе ја дочекаш Новата година?

– Со песна за крај. „Среде соба високо, елката ни стои и ја красат играчки во илјада бои! Елко, елко, порасни уште две-три педи за да може Дедо Мраз дарови да реди!“ Многу ми е драго што сум дома и ќе ја дочекам Новата година со семејството.