Божиќното украсување за многумина не е само естетски момент, туку начин да се внесе топлина, мир и радост во домот. Во пресрет на новогодишните и божиќните празници, голем број Македонци на социјалните мрежи споделија како изгледа нивната празнична атмосфера – од светилки и елки, до внимателно одбрани детали што го прават домот поубав и пополн со духот на празниците. Меѓу нив е и Ана Лазаревска, која ни дозволи да ѕирнеме во нејзината празнична магија и во начинот на кој го уредува својот дом во овој период од годината.

Ана е инфлуенсерка од Охрид со речиси 9 илјади следбеници на социјалните мрежи, препознатлива по својата изразена естетика и чувство за добра фотографија. Она што особено ја издвојува е вниманието на деталите, без разлика на сезоната. Нејзините фотографии, сепак, најмногу воодушевуваат за време на новогодишните и божиќните празници, кога домот и кадрите што ги споделува зрачат со топлина и празнична магија. Таа е сопруга, но и мајка на седумгодишната Сара, за која, како што вели, особено ѝ е важно да создаде вистинско празнично чувство во домот.

Кога и како се роди твојата љубов кон божиќното украсување?

– Уште од најрана возраст, кај нас во домот секогаш и за секој празник се украсуваше и во мир и благосостојба се дочекуваа празниците. Желбата стана уште поголема откако станав сопруга и мајка, кога имаш свое местенце и со голема љубов го украсуваш.

Кога започнува божиќната магија во твојот дом и колку време ти е потребно за целосно украсување?

– Со украсување секогаш започнувам во декември. За целосно украсување на домот ми е потребна една недела, затоа што секогаш има нешто што ќе го преуредам додека да дојдам до посакуваниот изглед и атмосферата која сакам да ја добијам.

Каков стил на божиќно украсување најмногу те опишува?

– Практикувам традиционален стил на украсување. Зелената, црвената, белата и златната за мене се вистинските божиќни бои и никогаш не би ги сменила. Секоја година украсувам исто, но секогаш надополнувам со нови детали. Оваа година, првпат направив мала промена – на елката имам само една голема црвена панделка, за да се испочитува трендот.

Кое е парчето декорација што ти е најдраго?

– Посебно значење за мене има лампионот со името на мојата ќеркичка.

Од каде најчесто ја црпиш инспирацијата?

– Во пракса ми е, пред да почнам со украсување, да отворам и да пребарувам на Пинтерест.

Имаш ли божиќен ритуал поврзан со украсувањето?

– Немам некој посебен ритуал, но украсувам на почетокот на декември заедно со ќеркичката, со божиќни песни во позадина. А кога сè е готово, знаеме да седнеме покрај елката со топло чоколадо.

Кое чувство сакаш да го предизвикаш кај луѓето кога ќе го видат твојот дом?

– Сакам да им разбудам чувство на мир, топлина и хармонија и, секако, да си бидеме инспирација едни на други.

Исто така, ќе ја искористам оваа прилика да им ги честитам новогодишните и божиќните празници на сите ваши читатели.

Интервју со Никола Блажевски, вљубеник во ентериерно уредување: Со украсувањето на нашите домови внесуваме радост и нова енергија