Акциите на американската компанија за обувки паднаа за речиси 30 проценти откако компанијата предупреди за пад на продажбата. Иако царините на претседателот Доналд Трамп и нестабилноста на глобалниот пазар беа делумно обвинети за лошите резултати, има сè повеќе индикации дека трендот „грди чевли“ конечно го губи пазарот. Падот од 29,2 проценти на вредноста на акциите беше најголемиот еднодневен пад од 2011 година, испраќајќи ја вредноста на компанијата на најниско ниво за три години.

За време на пандемијата, продажбата на „крокс“ скокна бидејќи потрошувачите масовно бараа удобни обувки. Иако оваа обувка се врати на модната сцена, па дури и на црвениот тепих, се чини дека ситуацијата се менува.

Извршниот директор на „Крокс“, Ендру Рис, објаснува дека американските потрошувачи станале „супер претпазливи“ и ги намалуваат купувањата поради економската неизвесност. Повисоките каматни стапки и зголемената инфлација ги наведоа купувачите да ги ограничат трошењата. Слична ситуација потврдија и други брендови, како што е „Мекдоналдс“, кои забележаа дека клиентите со пониски приходи купуваат брза храна поретко за да заштедат пари. Модните куќи, како што е „Ралф Лорен“, исто така изразија претпазливост во врска со идните трошења.