Трикратниот светски првак во маратонско пливање Евгениј Поп Ацев (33) ја започна сезонава во Светската серија ултрамаратони на ФИНА со подиум. Поп Ацев заврши како третопласиран на Охридскиот маратон на патеката од 25 километри со време 5:10:34,50 часа, зад Италијанецот Едоардо Стокино (5:10:32,00) и шампионот, Французинот Аксел Рејмонд (5:10:31,00).

Ова беше прв маратон од оваа серија сезонава, откако неколку беа откажани поради коронавирусот. Сезонава оваа серија предвидено е да има само три маратони. За две недели треба да се одржи Капри – Наполи, а најверојанто серијата ќе заврши во Аргентина во ноември со маратонот во Розарио. Амбицијата на нашиот најдобар маратонски пливач е на крајот да биде прв во вкупен пласман во оваа серија најтешки маратони. За Евгениј ова би била четврта таква титула, откако беше првак во 2015, 2017 и 2019 година.

– Имам шанси. Три пати бев првак во Светската серија ултрамаратони. Има шанси и сезонава да бидам прв, тоа ми е амбиција. Ќе видиме. Има уште две трки, а сега сум третопласиран на ранг-листата – вели Поп Ацев.

Охридскиот мартон сезонава беше силна и брза трка, а Евгениј доцнеше само три ипол секунди зад победникот.

– Задоволен сум со третото место. Одев на победа, имав шанси, но на крајот за неколку секунди беа подобри Италијанецот и Французинот. Французинот беше фаворит, тој е актуелен светски и европски првак. На домашен терен секогаш се надевам на победа. Темпото беше многу силно, интересна тешка трка во Охрид. Немаше тактизирање, како што знае да има во Охрид, беше со силно темпо од почеток до крај – вели Поп Ацев кој во Охрид има една победа (2015, кога стана прв Македонец победник на ОМ), три втори места (2014, 2017, 2019) и две трети места (2011, 2021).

Поп Ацев сезонава всушност плива во две серии, односно ултрамаратони (25 км и повеќе) и во олимписката дисциплина 10 километри. Ќе плива и в сабота во трката од Светската серија на 10 километри во Охрид.

– Тешко и напорно е да пливате во две серии паралелно, но не можам да не пливам затоа што трките се во Македонија. Мислам дека ќе бидам подготвен и на 10 километри претстојниот викенд. Во Охрид ќе пливаат педесетина пливачи. Охрид е прва трка од овој Светскиот куп, по Олимписките игри и ќе дојде светската елита. Слушнав дека меѓу другите ќе учествуваат Кристоф Расовски (Унгарија), олимписки вицепрвак и Марк-Антоан Оливје, првиот на ранг-листата во оваа серија моментно. Кај жените веројатно ќе учествува олимписката шампионка на 10 километри Ана Масела Куња (Бразил) – вели Евгениј.

Што се однесува до неговите долгорочни цели, во план му е да учествува на квалификациите за ЛОИ 2024 Париз.

– Сезонава фокус ми беа квалификациите за ЛОИ Токио. Не успеав да се квалификувам, само две позиции бев „краток“ во пласманот во квалификациската трка. Ова ми е трет пат како се борам за да учествувам на ЛОИ и овојпат малку недостасуваше. Амбиција ми е, ако се е во ред, да се обидам уште еднаш да се квалификувам на ЛОИ, овојпат во Париз во 2024 година – вели искусниот маратонски пливач.

ФОТО: Французинот Рејмонд е победник на Охридскиот пливачки маратон, Поп Ацев на третото место