Директорот на Агенцијата за храна и ветеринарство (АХВ), Николче Бабовски на денешната прес-конференција потврди дека овошјето и зеленчукот во земјава се безбедни. Бабовски најави и дека во наредните денови ќе се знае дали АХВ ќе поднесе пријава за ширење лажна паника и тревога.

Тој информираше дека се негативни резултатите од анализите за наводно присуство на резидуи од метали и тешки метали.

-Негативни се сите резултати за наводни резидуми од метали или присуство на тешки метали во овошјето и зеленчукот. Не знам која беше целта да се шири паника меѓу граѓаните. Изгледа некој некого излажал или некој помешал микро и милиграми, рече Бабовски, одговорајќи на новинарски прашања во врска со обвинувањата на опозицијата.

Пред два дена Цветан Трипуновски од ВМРО-ДПМНЕ на својот фејсбук профил сподели информација според која олово, кадмиум и арсен се пронајдени во домат и краставица. Тоа, како што наведе Трипуновски, го покажуваат најновите извештаи за анализи направени од Државната фитосанитарна лабораторија.