Со цел да се олесни поднесувањето на апликациите за користење на субвенции во Росоман е отворена дополнителна канцеларија која со работа почнува од утре.

Освен во Росоман, вакви канцеларии ќе бидат отворени и во Босилово, Василево, Ново Село, Облешево, Богданци, Старо Нагоричане, Могила и Новаци.

Министерот за земјоделство, шумарство и водостопанство Трајан Димковски рече дека подрачните единици на Министерството се подготвуваат за почеток и реализација на Програмата за директни плаќања за оваа година.

Тој појасни дека во следниот период, пред почетокот на аплицирањето, ќе се отвораат вакви дополнителни канцеларии од времен карактер за потребите на подрачните единици поради големиот обем на работа и ќе бидат во функција само додека трае периодот на доставување барања.

Димковски оцени дека засега добро се одвива откупот и пласманот на праски.