Одбиено барањето за полициска заштита — Хари и Меган може да го откажат доаѓањето во Велика Британија
Војводата од Сасекс ги преиспитува плановите да ги донесе сопругата и децата во Велика Британија следниот месец откако беше одбиено неговото барање за полициска заштита.
Препорачано
Принцот Хари, неговата сопруга Меган и нивните деца Арчи и Лилибет требаше по првпат по четири години заедно да ја посетат Велика Британија.
Неговиот тим поднесе формално барање за полициско обезбедување во текот на нивниот престој во Британија, но наводно им било соопштено дека нема да им биде обезбедена заштита финансирана од даночните обврзници, објави Би-би-си.
Извори велат дека принцот Хари е потресен од одлуката, донесена само неколку дена пред планираното пристигнување на семејството, но дека сè уште сака да најде начин да ја оствари посетата.
Тимот на принцот Хари го чекал исходот од безбедносната проценка од страна на Кралскиот и ВИП извршниот комитет (Равек), тела кои за британското Министерството за внатрешни работи одлучуваат за безбедносните аранжмани за високите членови на кралското семејство.
Тимот на принцот Хари и Меган соопштил дека двојката веќе ја прифатила понудата во текот на патувањето да престојуваат на кралски имот како гости на кралот Чарлс, иако локацијата на избраната кралска резиденција не е објавена.
Извори од Бакингемската палата, меѓутоа, наведуваат дека не добиле потврда дека нивната понуда е прифатена.
Се очекуваше и дека двојката ќе користи приватен смештај во текот на престојот во Велика Британија. Полициска заштита би била достапна во текот на престојот на кралскиот имот, но надвор од тој простор принцот Хари би морал да се потпре на приватен тим за обезбедување што ќе патува со него од Калифорнија.
Семејството требаше да престојува во Велика Британија околу пет дена. Меган, војвотката од Сасекс, планираше да му се придружи на својот сопруг на голем број јавни настани во Лондон и Мидлендс.
Принцот Хари последен пат го виде својот татко во септември кога пиеше чај со кралот во Кларенс хаус, што беше нивна прва средба лице в лице од февруари 2024 година.
Последниот пат кога кралот Чарлс ги виде своите внуци лично беше во текот на прославите на платинскиот јубилеј на кралицата Елизабета Втора во 2022 година.
Конечната одлука за патувањето на сопругата и децата на принцот Хари ќе биде донесена во наредните денови.
