Новата чилеанска опсерваторија „Вера Рубин“ откри повеќе од 11.000 досега непознати астероиди, а во исто време попрецизно измери десетици илјади веќе познати објекти во Сончевиот систем.

Откритието е направено на почетокот на работата на Опсерваторијата, која користи телескоп со огледало од 8,4 метри и најголемата дигитална камера некогаш направена за астрономија, пренесува „Спејс“.

Меѓу новооткриените тела се 33 астероиди близу Земјата, како и околу 380 објекти зад Нептун.

Научниците велат дека ниту еден од новооткриените астероиди не претставува закана за Земјата.

Експертите истакнуваат дека овие резултати ги покажуваат извонредните можности на опсерваторијата, која веќе ги надминува традиционалните програми за пребарување на астероиди.

За време на 10-годишниот истражувачки проект, се очекува опсерваторијата да открие милиони нови објекти и значително да го подобри следењето на потенцијално опасните астероиди, како и разбирањето на формирањето на Сончевиот систем.

Научниците нагласуваат дека новите податоци ќе овозможат попрецизно одредување на траекториите на астероидите и порано откривање на можни закани, со што ќе се подобри планетарната одбрана.