После големата победа над Рафаел Надал, американскиот тенисер Френсис Тиафо запиша уште еден историски триумф во неговата кариера пласирајќи се во полуфиналето на грен слем турнирот „УС Опен“.

Пред домашната публика Тиафо успеа со резултат 3:0 во сетови да го елиминира деветтиот носител во Њујорк (САД), Андреј Рубљов.

Првите два сета Американецот ги доби во тај-брејк, првиот со 7:3, а вториот без загубен поен со 7:0, а третиот сет го освои со 6:4.

Тиафо за пласман во големото финале ќе игра против подобриот од дуелот помеѓу Јаник Синер и Карлос Алкараз.

Веќе е позната првата полуфинална двојка кај мажите, Карен Хачанов ќе ги одмери силите против Каспер Руд.

Во женска конкуренција како полуфиналистка се промовираше и шестата носителка Арина Сабаленка која со 6:1 и 7:6 (4) триумфираше над Каролина Плишкова од Чешка.

Сабаленка во полуфиналето ќе игра против победничката од последниот четвртфинален дуел во кој се среќаваат Ига Швјонтек и Џесика Пегула. Вториот полуфинален пар е Каролин Гарсија – Онс Жабер.