Нобеловката Мохамади е префрлена во болница во Техеран
Добитничката на Нобеловата награда за мир Наргес Мохамади е префрлена во болница во главниот град на Иран, Техеран, за медицински третман, пренесува Дојче веле.
Препорачано
Фондацијата управувана од нејзиното семејство соопшти дека Мохамади добила привремено суспендирање на затворската казна во замена за плаќање значителна сума кауција.
Таа сега е префрлена со амбулантно возило во болницата „Парс“ во Техеран „за да биде лекувана од својот медицински тим“.
Фондацијата не даде детали за условите на кауцијата или за суспензијата на нејзината казна.
Сопругот на Мохамади, Таги Рахмани, кој живее во Париз, исто така потврди на социјалните мрежи дека таа била префрлена во Техеран.
Пред десет дена, Мохамади беше хоспитализирана во северозападниот град Занџан, каде што беше затворена, откако колабираше во својата затворска ќелија.
Братот на Мохамади, Хамидреза Мохамади, кој живее во Осло, Норвешка, изјави дека медицинските експерти претходно препорачале нејзин трансфер во Техеран, но одлуката била блокирана. Тој ја обвини иранската разузнавачка служба.
„Сега чувствувам олеснување. Можам полесно да дишам“, изјавил тој за новинската агенција АП во порака.
Што е познато за состојбата на Мохамади?
Мохамади имаше два сомнителни срцеви удари — еден во март и друг на 1 мај — додека беше во затвор во Занџан.
54-годишната активистка за човекови права беше итно пренесена во болница на лекување, но остана под постојан надзор.
Нобеловката Мохамади доживеа срцев удар во затвор – пренесена е во болница во Иран
Нејзиниот сопруг во саботата објави на социјалните мрежи дека нејзината состојба е критична. Според Рахмани, таа претрпела сериозен пад на крвниот притисок и имала потешкотии со говорот.
Нејзината адвокатка со седиште во Париз, Ширин Ардакани, објави фотографија од Мохамади во болнички кревет, додавајќи дека таа изгубила 20 килограми во затвор, но моментално е „во рацете на својот медицински тим“.
Според нејзиниот брат Хамидреза, Мохамади имала белодробна емболија (згрутчување на крвта во белите дробови) уште пред нејзиното последно затворање во декември 2025 година.
Од нејзиното затворање, Мохамади страдаше од болки во градите, варијации на крвниот притисок, силни главоболки, вртоглавица, мачнина и двоен вид, соопшти „Амнести Интернешнел“ на почетокот на мај.
Во тоа време, „Амнести Интернешнел“ го спореди одбивањето на специјализирана медицинска нега за Мохамади со „тортура“.
Зошто е Мохамади досега во затвор?
Мохамади беше осудена на нова затворска казна од седум и пол години, соопшти фондацијата во февруари, неколку недели пред САД и Израел да започнат војна против Иран. Нобеловиот комитет потоа го повика Техеран веднаш да ја ослободи.
Таа беше уапсена во декември откако ја осуди смртта на адвокатот Хосров Аликорди.
Обвинителот Хасан Хематифар им рече на новинарите дека таа дала провокативни забелешки на комеморацијата на Аликорди во североисточниот град Машхад и ги охрабри присутните „да скандираат слогани што ги кршат нормите“ и „го нарушуваат јавниот ред“.
