Научниците ја открија најсветлата светлина некогаш емитирана од црна дупка, која има интензитет од 10 трилиони сонца, објави „Еј-би-си њуз“.

Ваквите експлозии на светлина и енергија можат да бидат резултат на интеракцијата на магнетните полиња или исфрлањето на загреан гас околу црните дупки.

Експлозиите на светлина им помагаат на истражувачите да ја разберат внатрешноста на црните дупки.

Овој феномен е снимен во 2018 година од камерата на опсерваторијата Паломар во Калифорнија, а снимената светлина светела со својот најсилен интензитет околу три месеци, а потоа почнала да слабее.

Ова најверојатно се случило затоа што голема ѕвезда се приближила премногу блиску до црната дупка и била скршена на фрагменти.

– На почетокот, не можевме да им веруваме на бројките што го покажуваа интензитетот на енергијата – рекол авторот на студијата Метју Греам од Калифорнискиот институт за технологија.

Експлозијата на светлина потекнува од супермасивна црна дупка оддалечена 10 милијарди светлосни години, што ја прави најоддалечената слика некогаш снимена.

Светлината потекнува од времето кога универзумот бил релативно млад, а една светлосна година е еднаква на растојание од 9,7 трилиони километри.

Проучувањето на ваквите феномени им помага на истражувачите подобро да ја разберат ѕвездената средина околу супермасивните црни дупки.

Скоро секоја голема галаксија, вклучувајќи го и нашиот Млечен Пат, има супермасивна црна дупка во својот центар, но научниците сè уште не се сигурни како тие се формираат.

Резултатите од истражувањето беа објавени денес во списанието „Нејчр астрономи“.