На 10 дена до стартот на Европската златна лига, селекторот Хари Наковски ги решава првите дилеми за играта на македонската машка сениорска одбојкарска репрезентација во новиот циклус чијашто крајна цел е пласман на Европското првенство 2026.

Нашите најдобри одбојкари ќе тренираат во Струмица до 8 мај кога ќе отпатуваат на пријателски натпревари против Романија.

Потоа ќе се вратат во салата „Парк“ и ќе тренираат до почетокот на Европската златна лига на 17 мај, со првиот турнир на кој ќе им бидеме домаќини на Чешка и на Естонија. Следните два се во Белгија и во Хрватска.

Во август се два од четирите натпревари во квалификациите за ЕП 2026. Акцентот ќе биде ставен токму на нив, затоа што преку Грузија и Грција, Македонија бара шанса за четврти континентален собир по ред.

– После неколку завршени тренинзи, и почетната проверка на играчите, можам да кажам дека сме на некое задоволително ниво, во добра форма, и полека почнуваме со воигрување на поставата и подготовката за натпреварите кои следуваат. Моментално здравствената состојба кај одбојкарите е добра, освен кај Лука Костиќ кој има мала повреда, но се надеваме со текот на денешниот ден и тој ќе биде во стројот на тренинзи. Во четврток одиме за Романија на двомеч против тамошната репрезентација и полека да ја подигнеме формата за почетокот на првиот турнир од Европската златна лига во Македонија – вели Наковски.