Од 13 до 18 август на стрелиштетот „Бејбунар“ во Охрид се одржаа завршните подготовки на македонската параолимпијка Оливера Наковска Бикова пред заминувањето на Параолимписките игри во Токио, Јапонија.

– Ние сме подготвени достојно да ги браниме боите на нашата држава. После скоро две години апстиненција од врвни спортски натпревари, време е да се впуштиме во борба со конкурентите, со надеж дека поред другото и спортската среќа ќе ни биде наклонета – известуваат од Македонскиот Параолимписки комитет.

Воедно Македонскиот Параолимписки комитет упатуваат благодарност до ИПЦ, Агенцијата за млади и спорт, Министерството за труд и социјална политика, за обезбедување на услови за непречени подготовки, опремување и учество на параолимпискиот тим на Македонија на Параолимписките игри во Токио.

Параолимпијадата во Токио ќе се одржува од 24 август до 5 септември без присуство на публика на трибините поради пандемијата предизвикана од вирусот ковид-19.

Наковска Бикова ќе патува во Токио со обезбедена норма, според најавите ќе учествува во три дисциплини, П2-воздушен пиштол жени 10 метри на 31 август, потоа на 2 септември во П3-спорт пиштол 25 м, а на претпоследнито ден во П4-пиштол слободен избор 50 м.

Наковска Бикова на Параолимписките игри во Лондон 2012 успеа да го освои златниот медал во дисциплината воздушен пиштол (10 м).