На Универзитетот на југоисточна Европа (УЈИЕ) во Тетово, денеска беше отворен новиот Факултет за здравствени науки, на кој со стручно знаење ќе се стекнуваат идни медицински сестри и физиотерапевти. Отворени се неколку високоопремени предавални, во кои наставата ќе можат да ја следат околу 150 студенти.

Ректорот на УЈИЕ Абдулменаф Беџети вели дека факултетот засега ќе има две студиски програми: за медицински сестри и за физиотерапија.

„Отворањето на овој факултет беше едно не така лесно патување, бидејќи оваа област е многу регулирана. Поминавме низ сите институционални филтри за да дојдеме дотука. Важно е што подготвивме добра техничко-технолошка структура, за нашите студенти да можат да ја следат и практичната настава, која овде претставува околу 50 проценти од наставата. Предвидено е, освен нашите студенти, овие капацитети да ги користат и средните медицински училишта. На почетокот ќе има две студиски програми: Факултет за медицински сестри и Факултет за физиотерапија. Капацитетот ќе биде околу 150 студенти, но во првата генерација бројот ќе биде помал“, изјави Беџети, според „СДК“.

Официјалното решение од Министерството за образование и наука го предаде министерот Јетон Шаќири, кој заедно со ректорот Беџети денеска ја пресече црвената лента и го отвори новиот факултет.