Младиот Чеда Алексиќ од српското студентското движење во разговор со Н1 зборуваше за саботниот собир што го организираат во Нови Сад – „Не застанавме“, а воедно кажа дека ако се распишат избори за претседател, тогаш студентите одлучиле да одат со свој кандидат.

Студентот наведе дека на собирот во Нови Сад ќе понудат некои од решенијата за кои се залагаат.

„Во сабота нè очекува мирен собир на кој ќе зборуваме за актуелните теми и ќе направиме осврт на локалните избори. Ова е собир, а не протест. Постојат причини и за протест, но досега веќе доволно го изразувавме нашето незадоволство, па време е да понудиме и решенија за тоа како некои работи можат да се подобрат“, рече Алексиќ.

Говорејќи за безбедноста на собирот, тој истакна дека постои страв од инциденти, но организаторите преземаат мерки тој да помине мирно.

„Власта во секој случај сака да нè прикаже како насилници, па ќе има луѓе кои лажно ќе се претставуваат како дел од нас за да предизвикаат немири. Собирот е планиран да заврши пред да се стемни, кога ќе ги замолиме граѓаните мирно да се разотидат, за да бидеме сигурни дека од наша страна нема да дојде до инциденти“, посочи тој.

„Мора да победиме под овие изборни услови“

Говорејќи за изборните услови, тој оцени дека законската рамка формално постои, но дека во пракса не се применува целосно.

„Самите изборни закони не се лошо поставени и овозможуваат добра рамка за спроведување на изборите, но тие закони всушност не функционираат во пракса. Сметаме дека под овие услови мора да победиме, бидејќи сме сигурни дека власта нема да прифати фер услови, затоа што знае дека би изгубила“, рече Алексиќ.

Тој додаде дека студентското движење ќе работи на обука на контролори за изборите, наведувајќи ги искуствата од локалните избори.

„На локалните избори имавме можност да го тестираме системот за кој размислуваме. Тогаш не учествувавме во составувањето на листите, туку бевме техничка поддршка“, наведе тој.

Алексиќ смета дека препораките на ОДИХР, кои власта ги усвоила, суштински не ги менуваат изборните услови, туку произведуваат негативен ефект.

„Власта нема да попушти под притисок, затоа ќе се приспособиме на постојните изборни услови и ќе ги ублажиме ефектите што тие ги предизвикуваат. Препораките на ОДИХР, наводно, се прифатени, но се избрани токму оние што суштински ништо не менуваат, туку повеќе го отежнуваат спроведувањето на изборните услови“, рече тој.

ВИДЕО | Маскирани луѓе тепаа новинари и студенти, полицијата апсеше мирни граѓани: Изборите во Србија не поминаа баш во демократска атмосфера

„Кога ќе нè удри полициската палка, на следниот собир нè има уште повеќе“

Алексиќ оцени дека целта на движењето е да стане поширок општествен фактор.

„Таканаречениот ‘цунами-ефект’ го постигнуваме така што остануваме непоколебливи. Кога ќе нè удри нечија полициска палка, на следниот собир нè има уште повеќе“, нагласи студентот.

Запрашан да ја прокоментира пораката на германскиот канцелар Фридрих Мерц, кој изјави дека Србија мора да одлучи каква иднина сака, Алексиќ одговори дека верува оти таа порака пред сè се однесува на власта.

„Ние секако сме најсилниот политички актер, што го покажуваат и истражувањата и собирите, но сметам дека тоа прашање е упатено до владејачката партија, која веќе 14 години го ветува патот кон Европската Унија. ЕУ повеќе не може да чека и да ги слуша лагите што ги пласира власта“, наведе тој.

ЕУ е загрижена за насилството на локалните избори во Србија, бара државата да спречува притисоци и заплашувања

Заеднички настап со опозицијата?

Што се однесува до опозицијата, Алексиќ нагласи дека на почетокот на борбата изразиле независни и дека во ниту еден момент нема да настапува заедно со неа.

„Нашата благодарност важи за секоја организација што нè поддржува, особено кога станува збор за политички организации. Тоа е чекор поблиску до создавање референдумска атмосфера на изборите. Не можам да кажам дека нешто им должиме, затоа што ние сме во оваа борба една година, а и тие се во неа подолго од нас, но во изминатата година почувствуваа дека треба да застанат покрај нас“, објасни студентот Алексиќ.

На прашањето за евентуално формирање конкретна политичка организација, Алексиќ рече дека за тоа сè уште се размислува.

„Некој формален облик на организација мора да постои доколку сакаме да учествуваме на изборите, а за различните модели сè уште разговараме, за да не ја изневериме довербата на граѓаните“, рече тој.

Српскиот студент Стојановиќ ексклузивно за „Слободен печат“: Луѓето мислат дека се откажуваме, но ние го менуваме фокусот

„Имаме планови за секое можно сценарио“

Тој додаде дека постои можност распишувањето претседателски избори да се искористи како политички момент.

„Свесни сме дека постои можност да бидат распишани претседателски избори и тоа е една од темите. Одлуката на движењето е дека, доколку до нив дојде, ќе имаме свој кандидат“, наведе тој.

Алексиќ исто така истакна дека студентското движење смета на различни сценарија.

„Имаме планови за секое можно сценарио. Нашата анализа покажува дека можеме да победиме, но тоа не е безусловно – неопходно е граѓаните да излезат на изборите и контролорите да бидат присутни на секое избирачко место“, заклучи Алексиќ.

Оставка ќе поднесам за три или четири месеци, размислувам за кандидатура за премиер, најави Вучиќ