Митревски: Ќе треба многу ангажираност и концентрација на мечот со Швајцарија!
Македонската сениорска репрезентација в недела (2 мај) од 18.00 часот во СЦ „Јане Сандански“ – Скопје ќе го игра последниот шести квалификациски натпревар за пласман на Европското првенство против Швајцарија.
„Црвено-жолтите“ веќе се промовираа како учесници на следното ЕП 2022 во Унгарија и Словачка, а нашиот голман Никола Митревски се надева дека победнички ќе се заврши овој квалификациски циклус, иако е тој свесен дека пред себе ќе имаат противник кој доста напредуваше во својата игра од последниот меѓусебен дуел кој го добивме лани во ноември во Шафхаузен со 23:25.
– Со оглед на тоа што успешно ги завршивме овие квалификации и веќе обезбедивме пласман на Европското првенство, кое е 11-то големо натпреварување по ред за Македонија, ни останува уште последниот натпревар кој за нас нема резултатско значење, но мислам дека послатко и поубаво нешто од победа во репрезентативниот дрес нема, така што сите сакаме да победиме во недела и се подготвуваме за тоа.
Добиваме доста податоци од стручниот штаб што и како треба да играме, мислам дека ќе биде доволно подготвени за да покажеме една солидна и добра игра и го крунисаме овој квалификациски циклус со триумф.
Миркуловски: Доколку ги спречиме Шмид и Рубин, ќе се радуваме во недела!
Швајцарците доста напредуваа, тоа го покажаа и на Светското првенство, имаа многу добри натпревари, сега и последниот против Данска. Не се некоја светска велесила, но имаат многу квалитетни и искусни играчи кои знаат што прават и што сакаат во напад. Ние имаме солидна одбрана и за да одговориме на тој нивни напад, ќе треба многу ангажираност, многу концентрација за да се спречат нивните напади.
Имаме ден-два да ги завршиме тие договори и тактички замисли на стручниот штаб како треба да изгледа нашата одбрана. Против Финците ги потрошивме тие промашени шутеви, како и на празен гол, се надеваме дека на следниот дуел ќе бидеме поефикасни во завршницата – изјави Митревски.