МИ: Бронза за Георгиевски, поради стомачен вирус не настапи во полуфиналето
Дејан Георгиевски го заврши настапот на Медитеранските игри во Оран (Алжир) со освоена бронза, иако имаше амбиции да атакува на златниот медал.
Македонскиот таеквондист по победата во четвртфиналето над Египќанецот Ахмад Мохамед, во полуфиналето требаше да се бори против Ајуб Басел од Мароко.
Нашиот натпреварувач денеска имаше исклучително силна дехидратација поради високо интензивен стомачен вирус и затоа не настапи во полуфиналната борба. Заради доброто на нашата олимписка икона, од тимот одлучија да биде прекинат денешниот поход.
Во оваа категорија бронзен медал освои и Италијанецот Роберто Бота, а во финалето Хрватот Иван Шапина со 35:25 го совлада Басел.
За нашата земја ова е трет медал на МИ, претходните два беа од борењето, „бронзен“ беше и Владимир Егоров, а со злато се закити Магомедгаџи Нуров.
Во понеделник (4 јули) ќе настапат останатите македонски таеквондисти, во категоријата до 67 кг. во осминафиналето Анамарија Георгиевска ќе се бори против Зорана Сандиќ од Босна и Херцеговина.
Потоа, во категоријата до 58 кг. во осминафиналето Марко Аврамоски за ривал го има Мароканецот Јусеф Боатрис, а од осминафиналната фаза ќе започне и Филип Додевски во категоријата до 80 кг. во која силите ќе ги одмери со Хусејин Картал од Турција.
Трстена: Борачите успеаја, срамота е што другите македонски спортисти не освоија медал