Британскиот тенисер Енди Мареј ја прокоментира ситуацијата со Новак Ѓоковиќ кој по петдневен престој во хотел за мигранти во Мелбурн, на федерален суд го доби спорот со австралиската влада која мораше да му ја врати визата и со тоа доби право да ја брани титулата на Австралија Опен.

Мареј и Ѓоковиќ се познаваат уште од детството, а британскиот тенисер вели дека е добро што Ѓоковиќ се наоѓа на слобода.

– Позитивно е што Новак повеќе не е во притвор. Јасно е дека победи на суд и се надевам дека сега ќе може да се фокусира на тенисот – изјави Мареј кој потоа побара одговори од српскиот тенисер.

– Има уште неколку прашања на кои би требало да одговори. За изолацијата и сигурен сум дека ќе одговори. Додека тоа не се случи, тешко е дека ќе можам да дадам свое мислење за целата ситуација. Тука сум за да играм и да освојувам турнири.За прв пат победив тука по три години, не сум тука за да зборувам за такви ситуации – вели Мареј.