МАЛЕСКИ ЗА „СЛОБОДЕН ПЕЧАТ“: Сега нема потреба од вжештување на атмосферата во Македонија по повод бугарските услови – Слободен печат
ВестиМакедонија

МАЛЕСКИ ЗА „СЛОБОДЕН ПЕЧАТ“: Сега нема потреба од вжештување на атмосферата во Македонија по повод бугарските услови

Според Малески, не држи заклучокот на Бугарија дека македонскиот јазик е само дијалект на бугарскиот, затоа што дури и дијалектите можат да станат самостојни и да добијат статус на официјални јазици.

Професорот Денко Малески смета дека во овој момент за нас е најважно што Владата и Собранието на Бугарија дадоа поддршка за почеток на преговорите за членство во ЕУ. „Црвените линии“ на Бугарија, според него, се забелешки кои ќе треба сериозно да се разгледаат.

Имено, бугарската влада вчера усогласи декларација во која се наведуваат серија услови и закани за блокада на Скопје на патот кон ЕУ. Не смее да се споменуваат македонскиот јазик и „бугарскиот фашистички окупатор“

– Во овој момент најбитно е што Владата и Собранието на Бугарија дадоа поддршка за почеток на преговорите за членство во ЕУ. Забелешките кои се дадени во документите се нешто за што ние тука ќе мора сериозно да размислиме затоа што за нивното исполнување, Бугарија ќе инсистира во процесот на преговори. Македонија има своја приказна и Бугарија има своја приказна, но поентата ќе биде да се најде заедничката, европска вистина. Тоа ќе биде првенствено задача за политичкиот врв, а потоа и за академската заедница. Во прашање се преговори од неколку години, тоа е време во кое двете земји може да се усогласат. Треба отворено да се преиспитаат сите прашања, со желба да се постигне успех на крајот од процесот. Мое мислење е дека сега нема потреба од вжештување на атмосферата во Македонија по повод бугарските услови, и покрај тоа што меѓу нив има и такви што ниту најлибералните не би можеле да ги прифатат. На пример, не држи нивниот заклучок дека македонскиот јазик е само дијалект на бугарскиот, затоа што дури и дијалектите можат да станат самостојни и да добијат статус на официјални јазици.

Потребно е да се подготвуваме за она што не очекува. Треба да имаме предвид и дека на нашите балкански простори на разговорите за историјата треба да им се пристапува со посебно внимание кога се разговара со другата страна и со обид да се разберат и емоцијата и ставовите на другата страна – вели професорот Малески во изјава за „Слободен печат“.

Преземањето на оваа содржина или на делови од неа без непосреден договор со редакцијата на Слободен Печат значи експлицитно прифаќање на условите за преземање, кои се објавени на сајтот.

Тагови

Напишете коментар

Вашата адреса за е-пошта нема да биде објавена. Задолжителните полиња се означени со *

Close