Постојат многу начини на кои можете да приготвите летна манџа. Најчестата комбинација се пиперки и домати, но тоа не значи дека не можете да додадете и ориз, јајца, сирење и многу други зеленчуци. Пробајте ги овие три рецепта за летна манџа и одберете го вашиот омилен!

Рецепт број 1

Состојки:

– 1/2 кг пиперка

– 1/2 кг домати

– 2 поголеми главици кромид

– 2 чешниња лук

– 2 јајца

– врзоп магдонос

– сол, бибер и зачини по вкус

Приготвување:

Кромидот се динста на малку масло, па се додаваат лукот и пиперката, а потоа и доматот. Кога сето тоа ќе биде готово, се додаваат јајцата и зачините.

Совет: Со ваквата летна манџа, задолжително се јаде бело сирење и палента.

Рецепт број 2

Состојки:

– 3 поголеми главици кромид

– 1/2 кг пиперка

– 1 кг домати

– 1 поголем модар патлиџан

– 2 дланки ориз

– сол, бибер, оригано

– масло

Приготвување:

На масло се динста кромидот, па се додава пиперката. Кога пиперката ќе омекне, се додава модриот патлиџан, излупен и исечкан на коцки, а по 5 минути се додава и доматот исечкан на коцки. Сето тоа се динста 20-ина минути, а потоа во смесата се додава измиениот ориз. Температурата се намалува на минимум, па се остава летната манџа да се крчка уште 5 минути, но поклопена со капак. Додајте сол, бибер и оригано, па промешајте.

Совет: Со ваква летна манџа се јадат домашни колбаси.

Рецепт број 3

Состојки:

– 1 главица кромид

– 1/2 кг пиперка

– 1/2 кг домати

– 1 луто пиперче

– сол и бибер

Приготвување:

Се динста кромидот на малку масло, се додава пиперка и лути пиперче, домати, и сето тоа се крчка неколку минути. Потоа, се тргнува од рингла и летната манџа се послужува чорбеста со коцки препечен леб.

Ние ги пробавме сите три рецепти и не можеме да одлучиме кој ни се допаѓа најмногу! Пробајте и вие, па споделете го вашето мислење или испратете ни го вашиот омилен рецепт за незаменливата летна манџа.