Карпош ќе добие дневен Центар за лица со аутизам

Отворањето на дневен Центар за лица со аутизам на територијата на Карпош, кој ќе има за цел да овозможи нега и развој на вештините кај овие граѓани, беше главна тема на разговор на денешната средба меѓу градоначалникот на Општина Карпош, Стефан Богоев и амбасадорот на Бугарија во Скопје, Ангел Ангелов.

Од општинската прес-служба информираат дека овој центар се предвидува да се отвори во Тафталиџе 1, во просториите на постоечката амбуланта. Се очекува теренските активности да почнат на почетокот на 2021 година, а отворањето на дневниот Центар да биде во текот на пролетта,  2021 година.

Имено, слична ваква установа постои во Нови Сад (Србија), а згрижувачкиот капацитет би бил од 30 до 50 лица. Во насока на развивање на вештините кај овие лица се разговараше и за поставување на посебни содржини во надворешниот дел, како и изградба на сензорен парк.

– Со поддршка на оваа амбасада се планира целосно уредување на внатрешниот дел, реконструкција и негово адаптирање за прифаќање на лицата со аутизам. За овој центар, кој ќе биде прв од ваков тип во нашата држава, обезбедена е поддршка и од Министерството за здравство и од ЈЗУ Здравствен дом – Скопје, соопштуваат од Општината.

Градоначалникот Богоев ја изразил подготвеноста на Карпош да се вклучи во надворешно уредување на околниот простор, кој ќе се користи за лицата со попреченост, за различни рекреативни и едукативни цели.

– Како локална самоуправа даваме голема поддршка за младите лица со попреченост – децата (преку отворање на сензорните соби во училиштата и градење инклузивни игралишта). Овој центар навистина ќе овозможи поголема заштита на оваа категорија млади од 15 до 30 години, кои треба да се почувствуваат понезависни и да придонесуваат во заедницата, рече Богоев.

Антонија Велева, координатор на проекти во Република Северна Македонија од Амбасадата на Бугарија и Весна Стојановска од НВО „Во мојот свет” детално ги претставија активностите на овој центар.

Градоначалникот Богоев му се заблагодарил на амбасадорот и на другите ресорни институции кои ја препознале Карпош како инклузивна општина, која може да обезбеди унапредување на условите за живот на лицата со аутизам.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот