Американскиот државен секретар Марко Рубио денеска започна меѓународна иницијатива предводена од САД за да се фокусира на антитерористички напори против она што го нарече „екстремно левичарски терор“, велејќи им на претставниците од повеќе од 60 земји дека „левоориентираното насилство се занемарува“, пренесува Ројтерс.

Во говорот на отворањето на конференцијата за политички тероризам во Вашингтон, Рубио рече дека заканата од исламскиот милитаризам е „значително намалена“ благодарение на координираните меѓународни напори.

Но, тој предупреди на „неоспорната реалност“ дека растечкото левоориентирано насилство е „слепа точка“.

„Можеме и мора да ја идентификуваме и мапираме оваа закана и да ја обновиме архитектурата на антитероризмот за да ја победиме“, рече Рубио, опишувајќи ја транснационалната закана од групите што ги таргетираат политичарите и инфраструктурата и опишувајќи ги нивните мотиви како „омраза кон Западот и неговиот успех“.

Претседателот Доналд Трамп ја направи борбата против левичарските групи приоритет. Тој вети дека ќе преземе мерки против левичарските групи што ги обвинува за поттикнување насилство, по минатогодишното убиство на конзервативниот активист и негов сојузник, Чарли Кирк.

Администрацијата на Трамп организираше работилница во мај за да се дискутира за заканата што ја претставуваат крајно левичарските групи, додека друга ќе се одржи во Германија со ко-организација на САД.

„Или ќе соработуваме преку нашите граници или терористите ќе продолжат да ги искористуваат пукнатините меѓу нив. САД градат инфраструктура, партнерства и стратегија за да го победат злото на крајно левичарскиот терор“, рече Рубио.

Од ноември, Вашингтон означи четири европски групи како странски терористички организации и нуди награда до 10 милиони долари за информации за нивното финансирање.

Рубио рече дека левичарските групи работат со странски земји кои се непријателски настроени кон САД.

„Екстремисти во администрацијата“ 

Единаесет демократски пратеници вчера му испратија писмо на Рубио, во кое ја доведоа во прашање издржаноста на доказите кон левичарски групи и ја нарекоа контратерористичката стратегија на Белата куќа од мај, во која не се споменуваат неонацистички или други екстремно десничарски групи, „политички партиски документ“.

Во писмото, до кое дојде Ројтерс, се наведува загриженост дека прогласувањето групи за левичарски терористички организации може да доведе до таргетирање на легални протести и политички противници.

„Силно го повикуваме Министерството да се врати кон сериозна мисија која по дефиниција е неполитичка, заснована на податоци и втемелена во реалноста, наместо да ги одобрува политичките приоритети на екстремистите во рамките на администрацијата, чии ставови и политики ја доведуваат американската национална безбедност – и американскиот народ – во ризик“, напишаа пратениците.

Меѓу пратениците кои го потпишаа писмото се и Грегори Микс, највисокиот демократ во Комисијата за надворешни работи на Претставничкиот дом, како и Вилијам Кејтинг, највисокиот демократ во поткомисијата за Европа.

На конференцијата, заменик-шефот на кабинетот на Белата куќа, Стивен Милер, изјави дека левичарите се водени од „завист и омраза“, а демонстрантите на „антифа“ ги исмеваше како „сите на некој начин деформирани – во изгледот, облеката или начинот на однесување“.

„Зошто меѓу нив нема ниту една личност што изгледа нормално? Секој од нив, низ текот на својот живот и своите одлуки, го има нарушено своето тело и својот изглед на различни начини, до степен што нивниот надворешен изглед станува манифестација на нивната внатрешна омраза“, изјави Милер.

Администрацијата на Трамп сака да им го скрати престојот за странските студенти и новинари во САД