Горан Булатовиќ-Манза, тапанар и еден од основачите на легендарниот српски рок-бенд „Партибрејкерс“, почина на 67-годишна возраст. Веста за неговата смрт ја потврдија членовите на групата со објава на нивната официјална фејсбук-страница.

Во емотивната порака тие се простија од својот долгогодишен соработник и пријател.

„Последен поздрав до Манза, основачот на ‘Партибрејкерс’. Беше неповторлив. Еден од двајцата кои влијаеја на моето растење. Ти благодарам за сè!“, напишаа од бендот.

„Партибрејкерс“ е основан во 1982 година во Белград, а покрај Булатовиќ-Манза, основачи на групата беа и пејачот Зоран Костиќ-Цане и гитаристите Љубиша Костадиновиќ и Небојша Антонијевиќ-Антон.

Својот прв концерт бендот го одржа на 4 октомври 1982 година во белградскиот Дом на аматерите „Дадов“, како предгрупа на составот „Фифтис“. Оттогаш „Партибрејкерс“ изградија успешна кариера и станаа еден од највлијателните рок-бендови на просторот на поранешна Југославија.

Засега не се соопштени причината за смртта на Булатовиќ, ниту детали за времето и местото на погребот.