Пејачот Боби Андонов се враќа на македонската музичка сцена со новата песна „Момент“, негово прво музичко издание на македонски јазик по повеќегодишната кариера во Лос Анџелес.

Песната е инспирирана од неговата сопруга и од моментот кога првпат ја запознал.

„Од тој момент знаев дека таа е љубовта на мојот живот, сè за што сум сонувал. Песната е за тоа чувство кога знаеш дека си ја нашол личноста што те прави целосен“, вели Андонов.

Текстот е напишан во соработка со Магдалена Цветкоска, која, како што раскажува пејачот, веднаш ја препознала емоцијата и идејата што сакал да ја пренесе откако го слушнала првичното демо.

Продукцијата и аранжманот ги потпишуваат Боби Андонов и продуцентот Дони Браво, добитник на престижната музичка награда Греми, кој во својата кариера соработувал со Бени Бланко, „Дискложр“ и Крис Браун.

Македонската публика Андонов го памети уште од неговите детски музички почетоци, песната „Прати ми СМС“ и настапот на детската Евровизија. Дел од неговата музичка биографија е и настапот со Тоше Проески на концерт во Мелбурн, кога како тринаесетгодишно момче застана на сцената со македонската музичка ѕвезда.

По години работа во Соединетите Американски Држави, каде што создава и соработува со светски музички професионалци, Андонов најавува дека „Момент“ е само почеток на нов циклус во неговата кариера. Во план е да објавува музика и на македонски и на англиски јазик, а не ја исклучува можноста во иднина со Магдалена Цветкоска да работи и на македонски албум.

Тој најавува и почесто присуство во Македонија, како и повеќе настапи пред домашната публика.

„На сите што ме следат и ме поддржуваат уште од ‘Прати ми СМС’ – ви благодарам! Конечно го добив тој СМС, од љубовта на мојот живот, и од него се роди мојата нова песна ‘Момент’. Ви благодарам од срце. Се надевам дека ќе уживате!“, порача Андонов.

Интервју со Боби Андонов, пејач: Македонија ми е во крвта и сакам повторно да ја претставувам на Евровизија