Минијатурното знаме на Советскиот Сојуз, кое американскиот астронаут Баз Олдрин го понел со себе при историското патување до Месечината со леталото „Аполо 11“ во јули 1969 година, беше продадено на аукција во „Сотби“ за 102.400 долари, пренесува „Известија“.

Продажбата беше потврдена на 16 јули преку официјалната страница на аукциската куќа. Конечната цена значително ја надминала првичната проценка на експертите.

Станува збор за мало платнено знаме со димензии околу 10 на 15 сантиметри, кое било дел од личната опрема на Олдрин за време на мисијата и се наоѓало во командниот модул „Колумбија“.

Според информациите од „Сотби“, Олдрин го вклучил симболот на тогашниот Советски Сојуз во својот инвентар како дипломатски гест и како порака дека освојувањето на Месечината не е само успех на една држава, туку достигнување на целото човештво.

Мисијата „Аполо 11“ остана запишана во историјата како првото патување во кое луѓе стапнаа на површината на Месечината. На 20 јули 1969 година, Нил Армстронг и Баз Олдрин станаа првите луѓе што чекореа по лунарното тло.

Продажбата на ова знаме доаѓа во период кога предмети поврзани со историјата на вселенските истражувања и Студената војна често достигнуваат високи цени на аукции.

Претходно, на 18 јуни, во САД беше продаден и документ потпишан од советскиот лидер Јосиф Сталин од 1944 година. Документот, опишан како материјал од периодот на Втората светска војна поврзан со заштитата на ослободена Источна Европа, беше продаден за 13.764 долари на аукцијата „РР Аукција“.

Елек за спасување од преживеана патничка од Титаник оди на аукција, се очекува да достигне цена од 500.000 долари