Машката јуниорска кошаркарска репрезентација на Македонија го претрпе и вториот пораз на Европското првенство од Дивизијата „Б“, кое се одржува во Ријека и Опатија, Хрватска. И покрај тоа што нашите кошаркари во најголемиот дел од натпреварот ја имаа резултатската контрола, селекцијата на Босна и Херцеговина со подобар финиш стигна до пресврт и победа (86:75).

Македонија одигра одлично прво полувреме и на паузата замина со предност од 46:41, која можеше да биде и поубедлива. Во неколку наврати нашиот тим имаше водство од осум поени, а пропушти и неколку напади со кои можеше да стигне до двоцифрена разлика.

Нашите јуниори ја задржаа контролата и во третиот период. Во 26. минута Македонија поведе со 57:48, но не успеа да ја претвори предноста во двоцифрена. Тоа го искористи противникот, кој со серија од 13:2 во завршницата на третата четвртина израмни на 59:59. Малиниќ ги прекина минутите без поен за Македонија, па по три четвртини нашата селекција сепак имаше минимална предност – 61:59.

Со поените на Данев и Ѓорѓевиќ Македонија го отвори последниот период и повторно поведе со 64:59. Водството го задржа до средината на четвртината, кога БиХ израмни на 69:69, а потоа целосно го презеде натпреварот. Со серија во завршницата, Босанците поведоа со 80:73 и не дозволија Македонија повторно да се врати во игра, за конечни 86:75.

Најефикасен во македонскиот состав беше Ѓорѓевиќ натпреварот го заврши со 21 поен, четири скока и четири асистенции, Цветковски застана на ефект од 20 поени, три скока и три асистенции, додека Данев постигна 14 (имаше и три скока), а Нешовиќ додаде 10 поени и шест скока.

Во натпревар од третото коло во групата „Д“, нашата репрезентација в недела ќе се сретне со селекцијата на Унгарија.