По остриот пад предизвикан од пандемијата на коронавирус цената на храната во светот се стабилизира и покажува благо покачување соопшти денеска Агенцијата за храна и земјоделство при ООН (ФАО).

Индексот на ФАО на цената на кошничката со основни прехранбени производи се зголеми за 2,4 проценти во јуни во однос на претходниот месец, на просечни 93,2 бода.

Во услови на континуирана пазарна неизвесност, цените на растителните масла, шеќерот и млечните производи се стабилизираа по остриот пад во мај, достигнувајќи најголемо ниво во повеќе месеци, додека цените на житото и месото останаа под притисок на пазарот, се наведува во извештајот.

Цените на шеќерот се зголемија за 10,6 проценти во однос на мај, благодарение, делумно на извештаите за тесните грла во бразилските пристаништа поврзани со мерките за спречување на ширењето на вирусот, посочи ФАО.

Индексот, кој го покажува движењето на цените на млечните производи се зголеми за четири проценти, но цените на сите нејзини составни елементи останаа под нивото забележано пред ширењето на пандемијата, се вели во извештајот.