Пред официјалниот почеток на новата натпреварувачка сезона репрезентативците од младинските категории учествуваат на меѓународни тренинг кампови и турнири.

На турнирот во Опатија, Хрватска учествуваа јуниорската репрезентативка Ана Стојановска од Крива Паланка и кадетската репрезентативка Софија Хасану од Крушево. Во конкуренција на натпреварувачи од Хрватска, Словачка, Србија и Македонија, пријатна вест е дека Хасану го освои второто место.

Во финалето Хасану загуби од натпреварувачка од Србија со 3:2 иако имала водство од 2:0. Колку Хасану била блиску до освојувањето на првото место зборува и фактот дека против истата натпреварувачка во групната фаза на натпреварите извојувала победа од 3:2.

Стојановска и Хасану дополнително ќе учествуваат на подготовки заедно со хрватската јуниорска и сениорска репрезентација на Хрватса и репрезентативниот состав на една од германските покраини.

Добри вести доаѓаат и од Бугарија каде што на меѓународниот турнир во Ардино учествуваа поголемиот дел од репрезентативците во јуниорска и кадетска конкуренција. Борис Секулов од ППК Астраион Струмица го освои второто место. Машката кадетска репрезентација екипно исто така го освои второто место. Солиден настап имаа и нашите репрезентативки од младинските категории.

Колку пинг понгот станува сè попопуларен меѓу младите зборува фактот дека и дел од младите играчи кои претендираат на место во репрезентацијата, земаат учество на подготвителни тренинг кампови. Поголем број на играчи учествуваа на тренинг камп во Власина во Србија, а исто така дел од нив планираат да учествуваат на кампот во Крупањ во Србија.