На црвениот тепих во Кан повторно сè застана поради Бела Хадид. Манекенката се појави во рачно изработен фустан од модната куќа „Скијапарели“, кој претставува современа интерпретација на легендарниот модел што Џејн Биркин го носела кон крајот на шеесеттите години.

Третото појавување на Бела Хадид на скалите на Филмскиот фестивал во Кан уште еднаш ја потврди нејзината наклонетост кон драматични модни изданија, но овојпат акцентот беше ставен повеќе на модната референца отколку на провокацијата. За премиерата на филмот „Битката на Гол: Железното доба“ (La Bataille De Gaulle: L’Âge De Fer) таа избра уникатна висока модна креација од „Скијапарели“, за чија изработка биле потребни повеќе од 22 илјади часа работа.

Белиот чипкан фустан во боја на слонова коска бил изработен со техника на вез што создава оптичка илузија, со длабоко деколте, нагласена силуета во стил на сирена и долг повеќеслоен издолжен заден дел. Црниот украс на половината, како и контрастното корсетно врзување на задниот дел, дополнително ја нагласиле драматичноста на креацијата.

Дизајнот го потпишува креативниот директор на „Скијапарели“, Даниел Роузбери, а на изработката работеле 130 мајстори и занаетчии. Според достапните информации, само за сложениот вез биле потребни 22.160 часа работа.

Иако многумина го опишаа фустанот како „посмела“ верзија на оригиналот, модните анализи укажуваат дека станува збор за многу верна реконструкција на изгледот што Џејн Биркин го носела во 1969 година. Главните разлики се во покорсетираната форма, поструктурираната силуета и подраматичниот заден дел, додека самата идеја, чипката и препознатливите детали остануваат речиси идентични со оригиналот.

Токму затоа голем дел од модната јавност го доживеа ова издание повеќе како омаж на Џејн Биркин отколку како целосно нов моден момент. Наместо радикално редизајнирање, „Скијапарели“ се одлучи за внимателна современа адаптација на веќе култен изглед.

 

View this post on Instagram

 

A post shared by Vogue Australia (@vogueaustralia)

Стилистката Мими Катерел го надополнила изданието со минималистички накит од „Шопар“, чиј заштитен лик Бела Хадид е веќе со години. Косата ѝ била собрана во мазна пунџа, а шминката била во ненаметлив и елегантен стил.

 

View this post on Instagram

 

A post shared by Vogue Australia (@vogueaustralia)

Бела Хадид е редовна гостинка на Филмскиот фестивал во Кан уште од 2016 година, а нејзините појавувања речиси секогаш предизвикуваат реакции во модниот свет. Оваа година таа веќе се појави во архивски модел од „Ели Сааб“, како и во креација од „Прада“, која неодамна ја избра за своја прва глобална амбасадорка за сегментот за убавина.