Новата апликација наречена „Допишување со Исус“ („Text with Jesus“),  почна да привлекува внимание кај корисниците ширум светот, бидејќи дозволува виртуелни разговори со библиски ликови, вклучувајќи ги Исус, Марија и Јосиф, како и Сатаната, пишува „Бизнис инсајдер“.

Апликацијата, базирана на технологијата „Чет Џи-пи-ти“, им ветува на корисниците „духовно патување“ и „просветлувачки разговори“ со интерпретации на овие библиски личности.

Оваа апликација, развиена од Стефан Питер, претседател на „Катлоф софтвер“(„Catloaf Software“), им нуди на корисниците можност да разговараат со ликовите на „Светото семејство“.

Исус ги поздравува корисниците со зборовите: „Поздрав, пријателе! Јас сум Исус Христос, тука сум да зборувам со тебе и да понудам водство и љубов. Како можам да помогнам денес?“

За месечна претплата од 2,99 долари, корисниците можат да комуницираат и со Исусовите ученици, како Андреј и Филип. Достапни се и старозаветните ликовиАдам и Ева, но и Сатаната.

Креаторот на „ВИ Исус“, вели дека на корисниците им се овозможени секојдневни молитви и толкувања на библиски стихови. Питер додава дека апликацијата избегнува контроверзни теми и смета дека  толкувањата на тие стихови се разликуваат меѓу поединците и верските традиции.

Некои свештени лица изразија измешани чувства за апликацијата. И покрај тоа што ги признаваат корисните аспекти, како што се дневните молитви, тие нагласуваат дека апликацијата не може да замени подлабока религиозна интеракција и разбирање на религијата.

Покрај контроверзноста и скептицизмот, апликацијата „Допишување со Исус“ го привлече интересот на корисниците и создаде платформа за дискусија за верата, толкувањата и современите морални прашања.

Креаторот Стефан Петар не се консултирал со теолошки експерти, но ги поканил црковните водачи да ја тестираат апликацијата, за да обезбедат инклузивност и разновидност на одговорите.