Биографскиот филм „Мајкл“ (Michael), посветен на кралот на поп-музиката Мајкл Џексон, незапирливо се приближува до нова голема пресвртница на светските киноблагајни. Филмот на глобално ниво веќе заработи неверојатни 788 милиони долари и се очекува деновиве да ја надмине границата од 800 милиони долари, пишува „Верајети“.

Само во текот на изминатиот викенд, филмот оствари дополнителни 28,5 милиони долари надвор од Северна Америка, со што уште еднаш го потврди својот огромен успех ширум светот.

Филмот, кој на меѓународно ниво го дистрибуира „Universal Pictures“, а во Северна Америка „Lionsgate“, досега има заработено 468 милиони долари во странство и 319 милиони долари во Америка.

Со оглед на тоа што прикажувањето на филмот сè уште не е започнато во Јапонија (каде што се очекуваат рекордни бројки), аналитичарите проценуваат дека „Мајкл“ набрзо би можел да го собори досегашниот рекорд на „Боемска рапсодија“ (Bohemian Rhapsody), кој заработи 911 милиони долари, и официјално да стане најуспешниот музички биографски филм на сите времиња.

Својот триумф на благајните го продолжува и долгоочекуваното продолжение „Ѓаволот носи Прада 2“ (The Devil Wears Prada 2), кое ја надмина границата од 600 милиони долари глобална заработка. Филмот во текот на својот четврти викенд од прикажувањето инкасираше дополнителни 21 милион долари на меѓународниот пазар.

Ова продолжение во продукција на „Disney“ е особено популарно надвор од Северна Америка, каде што досега заработи 408 милиони долари, додека во САД оствари близу 200 милиони долари приходи.