Актерот Ештон Кучер призна дека неговиот изглед понекогаш му пречел во актерската кариера,пишува „Пејџ сикс“.

„Мислам дека секоја улога што ја добивате делумно се базира на тоа како изгледате, нели? Тоа е многу голем дел од она што му го давате на ликот. Значи, има улоги што ги добив поради мојот изглед и улоги што не ги добив поради мојот изглед. Понекогаш е фрустрирачки“, рече тој.

Кучер истакна дека пропуштил неколку сериозни улоги поради својот изглед, но дека сега ги разбира одлуките за кастинг. „Се обидувате да раскажете приказна со слики, а сликите мора да создадат чувство кај публиката“, објасни тој.

Тој исто така сподели дека неговата улога во претстојната серија „Убавицата“ е комплексна и нијансирана. „Без да откривам премногу, речиси секој од нас има исклучително слоевита улога каде што играме нешто што сме или не сме во одреден момент. Тоа создава можност да отелотворите несигурности што можеби ги имате, а кои ги криете и потиснувате и не дозволувате никој да ги види“, рече тој за серијата, која треба да пристигне во 2026 година.

Актерот ја нарече својата улога во серијата „едно од најголемите задоволства во неговата кариера“. За време на неговото појавување на New York Comic Con, актерот коментираше и за двојните стандарди околу козметичките процедури – теми кои исто така ќе бидат истражени во претстојната серија.

„Луѓето можат да одат на стоматолог и да стават протези, да ги поправат забите. Никој не го осудува тоа… но штом некој ќе направи ринопластика, сите се прашуваат: „Што направи?“. Зошто е во ред да се поправат забите, но не е во ред да се поправи лицето или носот?“, рече тој.

Креаторот на серијата, Рајан Марфи, ја опиша „Убавицата“ како „научно-фантастична медицинска серија за нов мутирачки, сексуално пренослив вирус кој ве претвора во вашето апсолутно совршено јас“. „А прашањето е – колку далеку би отишле за да станете убави? Што би жртвувале за тоа и дали е воопшто важно?“, откри тој.