Техничкиот премиер Талат Џафери продолжува со посетите во тетовско каде промовира почеток на градежни активности на проекти, но посетува и веќе изградени капитални проекти како студентскиот дом при Државниот универзитет во Тетово, за кој рече дека е еден од најмодерните во државата. Според Џафери, Тетово со овој објект веќе има комплетен универзитетски кампус, а како влада постојано и во сите региони се грижеле за студентите.

– Подобрување на квалитетот на животот на студентите во земјава останува приоритет, а за тоа се обезбедени 25 милиони евра за реконструкција на сите 9 државни студентски домови во Скопје, Прилеп, Битола, Штип и Охрид. На крајот на минатата година беше потпишан договор за реновирање и реконструкција на сите студентски домови во државата. Влогот во квалитетно образование е најдобра инвестиција. Младите со својот придонес се основен капитал за раст и развој на нашата држава. Нема да дозволиме тој наш капитал да се одлева надвор, рече Џафери.

Џафери беше придружуван од Министерот за образование Јетон Шаќири кој истакна дека мора да се работи на подобар стандард на сите студенти.