Во Англија од април следната година ќе биде забранета продажбата на енергетски пијалаци со висока содржина на кофеин на деца помлади од 16 години, соопштија британските власти, а пренесе Би-би-си.

Според новите правила, продавниците, рестораните, кафулињата, автоматите за продажба и интернет-платформите нема да смеат да продаваат пијалаци што содржат повеќе од 150 милиграми кофеин на литар на деца и тинејџери под 16-годишна возраст.

Забраната не ги опфаќа безалкохолните пијалаци со пониска содржина на кофеин, како што е диеталната „Кока-кола“, ниту чајот и кафето. Над утврдениот праг, пак, се наоѓаат пијалаци како „Ред бул“, „Монстер“, „Рилентлес“ и „Прајм“.

Британските власти наведуваат дека целта на мерката е да се намали дебелината кај децата и да се спречат проблеми како нарушувања на сонот, зголемена анксиозност, намалена концентрација и послаби училишни резултати.

Минимална возраст од 18 години за купување енергетски пијалаци веќе е воведена во Литванија, Летонија, Полска, Романија, Бугарија и во Унгарија, додека во Норвешка границата е 16 години. Во Австрија прашањето сè уште е предмет на јавна дебата, и покрај тоа што не постои законска забрана.

Австриската организација за заштита на потрошувачите „Фудвоч“ (Foodwatch) неодамна спроведе тест при кој деца успеале да купат енергетски пијалаци во ресторан на синџирот „Мекдоналдс“.

Од април годинава во австриските ресторани на синџирот се продава пијалакот „Тропикал енерџи рефрешер“. Организацијата испратила деца на возраст од осум, 11 и 14 години во повеќе ресторани во Виена и во околината, каде што без никаква проверка на возраста им бил продаден пијалакот.

На интернет-страницата на компанијата е наведено дека пијалакот содржи 31 милиграм кофеин на 100 милилитри и дека не се препорачува за деца и за бремени жени.

Според пресметките на „Фудвоч“, една стандардна чаша од овој пијалак содржи околу 93 милиграми кофеин, односно повеќе отколку лименка од 250 милилитри „Ред бул“.

Енергетските пијалаци се сметаат за потенцијален предизвикувач на карцином: Што ги прави толку ризични?