ДОДЕКА ЈА ЧЕКААТ ОДЛУКАТА ЗА ВРАЌАЊЕ: Обвинителите на СЈО на „Рузвелтова“ ги чуваат предметите
Советот на јавните обвинители во текот на денот ќе ги испрати одлуките за враќање на обвинителите на Специјалното обвинителство во матичните обвинителства. Претседателот на Советот, Ацо Колевски, за „Слободен печат“ кусо вели:
– Ќе ги поднесеме во најскоро време во „Службен весник“. Ги изработуваме, ги проверуваме и ќе ги испратиме.
Паралелно, обвинителите на СЈО на „Рузвелтова“ се обврзани од републичкиот обвинител Љубомир Јовески да ги чуваат предметите на обвинителството со кое раководеше Катица Јанева. Наредниот период ќе одат на работа во зградата на веќе згаснатото СЈО, сè додека не ги добијат решенијата и бидат вратени во матичните обвинителства.
Сепак, Јовески треба да пресече за предметите, кое обвинителство е надлежно и кои обвинители ќе продолжат да ги застапуваат предметите. Тој поединечно ги разгледува обемните предмети на СЈО, за да реши кој предмет во кое обвинителство да го распредели и кој обвинител понатаму да го застапува пред суд.
Не е исклучена и опцијата и досегашните обвинители на СЈО да ги застапуваат предметите за кои одлучува Јовески. Со оваа варијанта, обвинителите на СЈО и ќе ги работат досегашните предмети, но и нови кои ќе им бидат делегирани од матичните шефови на обвинителствата.