Визуелна симулација објавена на Јутјуб прикажува детално што се случува во женското тело во текот на сексуално возбудување и во моментот на оргазам, односно врвот на сексуалната возбуда, пишува „Лед бајбл“.

Оргазмот, како што е дефиниран од британската Национална здравствена служба, претставува врв на сексуалната возбуда и најчесто се доживува како силно пријатно чувство. Тој може да се разликува од личност до личност и да зависи од партнерот, околностите и самата ситуација.

Исто така, кај жените постојат различни видови оргазам. Дел од нив опишуваат послаби, брановидни сензации, додека други доживуваат поинтензивни и подолготрајни реакции. Некои жени имаат еден оргазам, додека кај други може да се јават повеќе последователни оргазми.

Што покажува симулацијата

Во видеото, објавено од каналот „инфиофициал“, преку анимација се прикажува како реагираат различни делови од телото во фазите на возбудување, сексуален однос и оргазам.

Во нарацијата се поставува прашањето: „Дали знаете како женското тело го гради и ослободува задоволството преку серија на силни промени?“

Потоа се објаснува дека женскиот оргазам претставува сложена психолошка и физиолошка реакција, додека визуелно се прикажуваат репродуктивните органи во детална, пресечна форма.

Физички промени во телото

Симулацијата покажува дека за време на сексуална возбуда доаѓа до зголемен проток на крв, што предизвикува набабрување на чувствителните делови, вклучувајќи го клиторисот, надворешните делови на половите органи и ѕидовите на вагината.

Во видеото се објаснува и дека се создава природна влажност во вагината, која го олеснува сексуалниот однос. Потоа се прикажуваат и внатрешни структури, при што се нагласува зголемената активност на мускулите во карличниот регион.

Во моментот на оргазам, според симулацијата, доаѓа до ритмички контракции на вагината, матката и карличните мускули. Овие контракции се поврзуваат со ослободување на насобраната напнатост и создавање чувство на силен физички интензитет.

Истовремено, во мозокот се активираат хемиски процеси. Се ослободуваат допамин и окситоцин, кои се поврзуваат со чувство на задоволство, опуштање и емоционална поврзаност по сексуалниот чин.

Во видеото се истакнува и дека овој процес значително се разликува од личност до личност, како по интензитет, така и по времетраење и субјективно доживување.

Индивидуално искуство

Симулацијата заклучува дека секое тело реагира различно и дека сексуалното искуство е индивидуално, зависно од физичките и психолошките фактори, како и од самата ситуација. На овој начин се прикажува дека оргазмот е сложен биолошки и психолошки процес, кој вклучува координација меѓу телото и мозокот, а не само момент на физичка реакција.

Постои ли „најдобар“ женски оргазам и како се постигнува?