Во совршен свет, секој отворено кажува што сака во кревет, никој не се навредува и сите уживаат. Но, реалноста е поинаква. За многу жени, сексуалната искреност изгледа ризична, се плашат дека ќе ги повредат чувствата на партнерот или се соочуваат со општествен срам дека нивните желби се претерани. Затоа, тие молчат, пишува „Вајс“.

Секс-терапевти, психолози и истражувачи го споделуваат она што жените најмногу посакуваат нивните партнери да го разберат.

1. Женската желба не е спонтана

Психотерапевтката Миранда Кристоферс објаснува дека на многу жени им се потребни вистински услови пред да се возбудат, емоционална поврзаност, чувство на безбедност и пријатна средина. Ова се нарекува реактивна (одговорна) желба. Со текот на годините и во подолгите врски, спонтаната желба кај жените опаѓа, па затоа поттикнувањето на реактивната желба е сосема нормален пат.

2. Жените сакаат да се чувствуваат активно посакувани

Постои огромна разлика помеѓу тоа да бидете некој со кого партнерот едноставно има секс, и некој кого партнерот активно и силно го посакува. Потребно е повеќе предигра, внимание и заведување.

3. Сексот веројатно не е толку добар колку што мислите

Истражувањата покажуваат дека речиси 60 отсто од жените некогаш одглумиле оргазам, најчесто за да не ги повредат чувствата на партнерот. Дополнително, многу жени продолжуваат со односот дури и кога тој е болен без да кажат ништо, што создава круг на анксиозност и уште поголема напнатост.

4. Домашните обврски го убиваат либидото

Списокот на секојдневни домашни обврски влијае врз желбата на жените многу повеќе отколку кај мажите. Традиционалните улоги (мајка, сопруга, домаќинка) делуваат анти-еротично. Колку е пооптоварена жената со домашни обврски, толку помалку простор има за сексуална желба. Поделете го товарот за повеќе страст.

5. Жените мора да бидат психички присутни

Најголемата пречка за женското задоволство не е анатомијата, туку неможноста да се исклучи мозокот. Жените се социјално програмирани постојано да се самоанализираат, како изгледаат, дали предолго трае, дали се премногу или недоволно добри. Овој внатрешен притисок ја убива возбудата.

6. Оргазмот не е секогаш поентата

Само околу 20 отсто од жените доживуваат оргазам исклучиво преку пенетрација. И покрај тоа, оргазмот стана дефолтна „целна линија“ според која се мери успехот на сексот. Кога притисокот ќе се тргне од крајниот резултат и ќе се префрли на заедничкото искуство, задоволството станува многу подостапно.

7. Должноста е непријател на желбата

Штом сексот ќе стане „обврска“, „долг“ што треба да се врати или против услуга затоа што партнерот ве изнел на вечера, жените целосно се исклучуваат од своите тела. Обврската и вистинската возбуда не одат заедно.

8. Планираниот секс не е лош знак

Нереално е да се очекува дека во долготрајна врска секогаш ќе бидете подготвени за акција во секој момент. Одвојувањето време (состанок во календар, вечер за самите вас) не е клинички или досадно, туку едноставно е практично и помага да се создадат вистинските услови.

9. Секс-играчките не се конкуренција

Само 4 отсто од жените велат дека пенетрацијата им е најсигурен пат до оргазам. Вибраторите се само корисни алатки, а не „закана“ за мажите. Дури 93 отсто од жените кои никогаш немале оргазам, успеале да го доживеат со помош на клиторичен вибратор. Жените кои користат играчки заедно со своите партнери пријавуваат повисоко сексуално и емотивно задоволство во врската.

10. Прашајте… и навистина слушајте

Најголемата заблуда во романтичните врски е митот дека „ако некој навистина ве сака, тој точно ќе знае што ви треба“. Тоа е целосно погрешно. Повеќето луѓе едноставно го повторуваат она што им успевало во минатото со други партнери. Прашајте ја партнерката што сака и бидете навистина отворени за нејзиниот одговор.