Во Соединетите Американски Држави се одбележуваат сто години од раѓањето на холивудската легенда Мерилин Монро, а по тој повод во градот Остри Беј на Лонг Ајленд, во близина на Њујорк, градоначалникот Џо Саладино откри спомен-плоча посветена на славната актерка, пренесува „Њујорк пост“.

Спомен-плочата се наоѓа на плажата Тоби, местото каде што младата Мерилин во 1949 година снимала серија фотографии кои, според проценките, одиграле значајна улога во нејзиниот пат кон Холивуд и стекнувањето на светската слава.

На плочата е врежана пораката: „Плажата Тоби не беше само тивко прибежиште; таа беше местото од кое започна една легенда“.

Градоначалникот на Остри Беј, Џо Саладино, ја откри спомен-плочата во петокот, токму на местото каде што тогаш дваесет и тригодишната актерка позирала во костим за капење со чадор.

„Плажата Тоби беше место од кое започна легендата“, стои на плочата поставена на локацијата каде што Мерилин позирала пред фотографот Андре де Динес.

Саладино изјави дека Мерилин Монро во тоа време го посетила Њујорк и барала начин да ја забрза својата кариера.

„Сакавме трајно да го овековечиме овој момент“, изјави тој.

Фотографот Андре де Динес ја избрал плажата во округот Насау за да ја прикаже нејзината младост, убавина и харизма во период кога таа сè уште започнувала со помали филмски улоги. Во тоа време Мерилин Монро сè уште го користела своето родено име Норма Џин Мортенсон. Според изјавите, таа на плажата извикала:

„Ајде да создадеме историја!“, додека пред неа се удирале брановите на Атлантскиот Океан.

Холивудските студија набргу ја забележале и нејзината кариера започнала брзо да расте во текот на педесеттите години од дваесеттиот век.

Мерилин Монро почина во 1962 година на возраст од 36 години, но остана една од највлијателните и најпознатите личности во историјата на филмот.