Министерот за земјоделство, Трајан Димковски и директорот на Агенцијата за финансиска поддршка во земјоделството и руралниот развој, Николче Бабовски денеска остварија средба со претставниците на здружението „Бело злато” и со земјоделци од кочанскиот регион.

Пред присутните соопштија дека од почетокот на идниот месец почнува исплатата на средствата наменети за зелена нафта за земјоделците кои минатата година добиле платежни картички, а оние кои годинава за првпат ќе бидат опфатени во програмата, ќе треба решенијата и картичките да ги подигнат во подрачните единици на ресорното министерство.

Со градоначалникот на Кочани, Николчо Илијев, се разговарало за актуелни прашања од реализацијата на програмите на ресорното министерство, како и за подготовките за пријавувањето на земјоделците за добивање субвенции, со оглед на актуелната состојба со епидемијата од КОВИД-19 и почитувањето на посебните протоколи.

Градоначалникот на Кочани, Илијев го пренесе предлогот на земјоделците од регионот за изградба на каскадно решение на реката Брегалница.

Во однос на изградбата на браната Речани на Оризарска Река, министерот Димковски информираше дека во почетокот на јули ќе почне ископот на т.н. опточен тунел, со што практично ќе стартуваат градежните работи на терен.