Топлите денови се пред нас, а тоа значи дека започнува и сезоната на тиквичката. За денешниот ручек се одлучив да ја подготвам на супер вкусен и едноставен начин. Рецептов е толку добар што ќе ви стане омилен оваа летна сезона, па воопшто не се двоумете и испробајте.

Потребни состојки:

4 тиквички
Сол по вкус
3-4 лажици маслиново масло ( може и сончогледово)
3-4 лажици вински оцет
2-3 лажици масло за јадење
3 чeшниња лук, ситно исечкани
1/2 китка магдонос, ситно исечкан
150 г овчо сирење, издробено
100 г шери домати

За таратурот:

1 свежа краставица
250 г грчки јогурт
2 чешниња лук
1 лажичка зачин за таратур
1 лажичка сув копар
Сол и мелен црн пипер по вкус
Сок од 1/4 лимон
1/2 лажичка суво нане

За тиквичките:

Најпрво исечкајте ги тиквичките на кругчиња. Посолете и оставете да ја испуштата водата околу 10-15 минути.

На загреано масло во тава пржете ги по 3 минути од секоја страна.

На крај за да сервирате, во чинија ставете ред од тиквичките, малку лук, наросете дробено сирење, свежо исечкан магдонос, шери домати и постапката повторете ја додека не ги потрошите состојките. На крај полејте со вински оцет и малку маслиново масло.

За таратурот:

Исечкајте ја краставицата на коцки и промешајте ја со сите состојки заедно.
Сервирајте со малку маслиново масло, маслинки и парче лимон.

Забавно готвење, ви порачува Давор.